حبّيت فيك ِ هالعيون و سحـرها وعطرّت كاسي من نقاوةْ خمـرها
حبّيت فيك ِ هالشّعر فوق الكتف يا ما ترك غصّات يلهب جمـرها
حبّيت فيك ِ هالجبين و هلـّتو يضوي الليالي من محاسن طلعتو
كيف العناية بكل روعة صنعتو كيف بْصنيعو ما تململ صبرها
حّبيت فيك ِ هالحواجب يا رباب هندي و يماني مسلـّطة فوق الرّقاب
منها انْشغال الفكر منها هالعذاب منها اعتلالي و الجّـرح يا مـرّها
حبّيت فيك ِ خدود يحسدها الشّفق رِبيت مع التّفاح و الجّوري رفق
ياما و ياما قلب من وجدو احترق قضـّى الليالي يفتكر بِسـرّها
حبّيت فيك ِ أنف لونو مرمري و الثّغر بحري من رحيقو العنبري
و شْفاف من مرجان فيها تفتري وسْنان لولو صاغ ربّي درّها
و العنق صافي متل خمرة بالقدح أو تلج هايم فوق أرزاتو انشلح
و الصّوت بلبل بالأيك ياما صدح أنغام زاد الرّوح حبـّك سكرها
حبّيت صدرك عاج ما متلو انوجد بين الصّبايا وبالبها وحدو انفرد
و نهود كَل ّ الوصف عنها و ابتعد بعدا زغيرة في أوائل عمرها
حبّيت فيك ِ كل ما فيك جمال و الجّسم و المريول و السّحر الحلال
إنتِ الصّبا إنت الغوى إنتِ الدّلال إنت الشّمس لو كان ضاحك ثغـرها
* * *